كم مره حسيت انه إنكتب لك عمر جديد

12 4

لايمكنك التصويت حتى الحصول على 20 نقطة على الأقل
إضغط هنا للإخفاء

fahd20 616
قبل 10 سنه و 8 شهر

السلام عليكم ورحمة الله وبركاته

كيف الحال ياشباب طيبين اليوم ابطرح موضوع جميل و مختلف شوي غالبا المواضيع ألي تطرح

وش افضل سياره عندك ولو عندك فلوس وش تشتري سياره ونروح معها أحلام ورديه وتتفاجئ منك

بتركب سيارتك ماتشتغل غير تنتشها ولا تلقى قزاز سيارتك معلق لايطلع ولا ينزل وإذا جيت بتركب

يقفز عليك بس من السياره وترتطم بالواقع وتحس بضيقه شوي وطبعا الحمد لله على كل حال الواحد

ماقصده يجزع بس يصف الموقف

المهم الموضوع هو وش اكثر موقف خطوره حصل لك وربك نجاك منه بأعجوبه وحسيت إنك من

أكثر الناس حظا وركبك تصافقت مع بعضها من الخلعه ورحت البيت وصليت ركعتين شكر لله

اببدأ بنفسي قصتي بدأت عندما اتفقت انا والشباب إنا بنطلع كشته مدتها يوم وليله و مع بزوغ

فجر ذلك اليوم صلينا الفجر وحملنا العزبه في السياره ومن جينا بنركب السياره فإذا بنا نتهاوش من

يركب قدام

وحذفوني في صندوق الهايلوكس وأهللك دمعتين من دموع التماسيح وركبوني في الغمارة ألي ورا

وقالولي لا عاد تتعودها قلت سار المهم وحنا طالعين من الحاره قابلنا واحد من العيال قال بروح معكم

قلنا له لا وجلس يبكي قلت انا ياتأخذونه معنا يا والله لانزل هنا قالوا إنزل قلتلهم امزح صدقتوا لا حول

ولا قوة إلا بالله المهم قلنا خلاص بناخذه قال ابعطي واحد من العيال غرض واجيكم والله ما اتأخر قلنا

ياولد

خويانا إسبقونا من قبل الفجر والعزبه معنا لا تأخرنا قال ابدا انا عمري تأخرت ماعمري تأخرت المهم

قلنا له عجل علينا هذا الكلام تقريبا الساعه 5 صباحا وننتظر ننتظر كسرنا جواله مقفل إلى الساعه 7

وسواقنا تقفل معه اعوذ بالله ويدعس للاخير للهيلوكس اسمع العنز في الصندوق تتشهد مع المطبات

ونمسك طريق ينبع القديم طريق رايح جاي المهم يمشي 190 ياولد هد الله يرحم امك هد الرجال قافله

معه ما كأنا نكلمه ياولد العنز معنا ماهو فايتنا شي لامرقه ولا أيدام ولا صامولي هد الله يرحم امك

الموت مافيه لعب لقد اسمعت إن ناديت حيا ***** ولاكن لا حيات لمن تنادي

وانا ألي ذابحني إن خبري فيه غشيم وثقه فوق الغشامه ماتنرقع بس ألي لازنا عليه معه هايلكس وحنا

سياراتنا مافيها حوض المهم وفيه منعطف بكبري جهت اليسار وألي راح مع طريق ينبع القديم يعرف

الكباري فيه من دون كتوف يعني الطريق يضيق دوب يشيل سيارتين ولا هذي التريله

جايه مقابلتنا وحنا رايحين المشكله المنعطف جهت اليسار يعني ماتشوف فيه

سيارات بتجاوز التريله ولا لا وحنا ماشين 190 يوم دخلنا الكبري ولا هذا ددسن متجاوز التريله

واغمض عيوني واتشهد والله شفت الموت مافيه مجال لنجاه ولا 0.0001 % وسبحان الله من فتحت

عيوني ولانا متعدين الكبري ويوقف سواقنا بعد الكبري ونسأل بعض كيف نجينا كلنا ماندري السواق

يقول لفيت قد ما اقدر جهت اليمين وغمضت عيوني ولا ادري وش سار ولا كيف تجاوزناهم ومن

بعدها سواقنا إذا تهور

يمشي 80 إلى اليوم والحمد لله إن الله نجانا من هذا الموقف المرير وسلامتكم

الهدف من الموضوع نذكر بعضنا لعشان إذا الواحد سولت له نفسه يتهور يتذكر إن العافيه تزول

بدقيقه وبخطأ بسيط قد يفقدك حياتك ولا صحتك طول عمرك وياكثر القصص ألي صارت لناس نعرفهم

يامتوفين يامشلولين يافيهم عاهات بسبب الحوادث أسأل الله إن يعافينا جميع والحمد لله ألي نجانا

ونحافظ على صحتنا قد مانقدر

واعتذر على الاطاله و الاخطاء الاملائيه

إبلاغ

الردود