استفسار عن الكاديلاك 2013

أحسن شي مر على اقرب شركه الجميح وتأخذ علومها من عندهم هو الوكيل لكدلك . وإذا نويت على الموتر لفحصه في الوكالة إذا سليم ومناسب انت حر في خيارك بعدها .. الله معك .

نعم تأكد من الوكيل

وعلى فكرة الكاديلاك ما يمسك سعر وراغبينه قليلين

الله يوفقكم والله العظيم ساعدوتني فكرة الفحص في الوكالة ما جات على بالي كنت بفحصها برا
إن شاء الله افحصها طيب قيمة الفحص كم تكلف 500 ريال أو اكثر؟

أخوي ممكن ما يوصل ٥٠٠ احتمال اقل .احسن من ما تخسر الكثير .

عسى ربي يدخلك الجنة من أوسع أبوابها
شاكر لك جداً

غاليه مره مافرق عن سعر الوكاله شي

وخله ينزلها السوق مستحيل توصل لسعره وحتى الوكاله قسم المستعمل

أخوي هذي طبعاً الفل مو ستاندر انا اول كنت احسبها ستاندر قلت نفس سعر الوكالة لكن سألته قالي هذي فل مكينة 3.0
برضوا ممشاها قليل 1400 فقط شاكر لك أخوي
يا إخوان بالله اللي يعرف قيمتها وكالة يقولي

السياره سته سلندر فل كامل سـعرها في الوكاله من 155 إلى 165 ما ادري كم بالضبط لاني اخبر هالسعر قبل شهرين وتأكد بنفسك
وما اظن الرجال باعها لان فيها شي لان السياره مازالت تحت الضـمان والضمان يشمل ايضاً تغيير الزيت مجاناً والممشى تبع السياره قليـل
ولو اخذتها ماراح تحط فيها ريال واحد لمدة 4 سنوات أو حتى 100 الف كم , ماعدا البريكات وبواجي ومساحات وكفرات

إذا إنت ناوي تستخدم فأنصحك فيها والكاديلاك بصراحه من أفضل السيارات من ناحية الراحه والرساوه والعزل والفخامه , بس أهم شي تسوي له صيانه كل ست شهور
وإذا انت رجلك حاره ولا راح تهتم فيه فأنصحك لا تاخذه راح يتعبك إذا اتعبته . 

بالنسبه للسـعر حاول معه بـ 120 الف وتحت ولو اخذته بـ 120 ايضا السعر جداً مناسب

وقبل ماتاخذها روح محل فحص يفحص لك البودي والمكينه وفي الدمام يفحصون بـ 150 ريال إلى 200 ريال .

وأيضا تواصل مع صيانة الكاديلاك وتأكد إذا السياره لها ملف عندهم ام لا . 

موفق

ياخي والله مدري كيف أدعي لك كل اللي بقوله ربي يوفقك دنيا واخرة وجعل مثواك الجنة وربي يسعدك ويرزقك كل شيء تتمناه
أفدتني جداً جداً
والله ياخوي رجلي باردة جداً جداً على السيارة ومهتم جداً جداً بشكل ما يتصور
الله يريحك أرحتني
بسوي اللي قلت عليه وإن شاء الله يحصل خير

اتمنى لك التوفيـق وقبل كل شي إستخيرر والله يكتب لك الي فيه الخـير . وتأكد انه فل لان الفل يفرق عن الستاندر الفتحه وشاشة نفيجيشن

ايوه فل فتحة ساقف وشاشة وخرائط
منتظر وكالة الجميح تفتح عشان أسوي الفحص ^_^

فحص الوكاله مكلف واتوقع بـ 2400 ريال :( 

فيه ورش يفحصون لك كمبيوتر ويطلعون لك المشاكل الي فيه 

إنت شوف الوكاله بكم وإذا كان غالي مثل ماذكرت روح لمحلات الفحص بالكمبيوتر

تحطمت 2400 كثير والله
بشوف المحلات حق فحص الكمبيوتر إن شاء الله خير
الله يوفقك ساعدتني كثير جداً

لا تتحطم ولا شي. ...مر الوكالة بنفسك وتاكد من سعر الفحص وانت الكسبان تدري ليه?

1-تتأكد ان الممشى حقيقي.
2-تتأكد ان الضمان والخدمه المجانية تشملك.

واسالهم بعد عن اسعار قطع الغيار مثل البطاريه البواجي الاقمشه والانوار الاماميه والاسطبات والمكينه والقير ,,

عشان تكون الصوره واضحه امامك ..

ونصيحه اذا انت ناوي تبيعها بعد سنه والا 3 سنوات فترى بينزل سعرها مبلغ كبير جدا ,,

وزي ماقال الاخ المستبد السياره تعتبر من السيارات الفارهه والمريحه والسلسه والقويه ,,لكن حسسسسسسسساسه جدا جدا جدا ,,

أخوي أسلامي فعلاً والله
ماني خسران لو تأكدت إن الممشى حقيقي ومن ناحية الضمان أعتقد إنها تشمل وأنا بحاول اتأكد
الله يوفقك افدتني شاكر لك أخوي

أخوي ميزار
والله انا تهمني السيارة أكثر شيء والله يقدر لي بكل خير
انا بستخدمها لين 5 سنوات وبالكثير 6 سنوات وبعدها بخذ سيارة ثانية وبخلي هذي معي السؤال هنا هل هي بتصمد 5 او 6 سنوات ^_^
شاكر لك أخوي الله يوفقك

بتصمد حتى 15 سنه لكن بشرط تكون سواقتك راكده ورجلك خفيفه وتحاول تهدي عند المطبات ,,

والافضل تشتري لك سياره صغيره ب 7 الاف او 9 الاف اكسنت وتخليها تخدم الكدلك للمشاوير القريبه والطرق المكسره ,,,

انا شريت كدلك 96 كونكور وماعليه

ماشي تمام لكن قطعه نااااار ...واكثر مشاكله في الحراره ومنظم الهوا ..لكن شبكت المراوح وشغاله ع طول وارتحت من الحراره ..

وممكن تتفق مع صاحب السياره اذا هو واثق من سيارته قله باروح افحص السياره ف الوكاله واذا طلعت تمام تدفع انت حق الفحص وتشتريها وااذا طلعت فيها مشكله يدفع هو قيمة الفحص وتكنسل البيعه ,,



لان الكدلك ترى مابيعرف له الا الوكاله ,,,

انا القرنبع اللي معي اوديه للحاير جنوب الرياض عشان اصلحه عند واحد هناك متخصص تشليح وتصليح كدلك فقط ..


وموفق ..