نظام الهيدروليك ونظام الزيت ونظام الهواء والفرق بينهم

25 9

لايمكنك التصويت حتى الحصول على 20 نقطة على الأقل
إضغط هنا للإخفاء

t o m a h a w k 761
قبل 8 سنه و 11 شهر

السلام عليكم ورحمة الله وبركاته
أولا الموضوع منقول من موقع 
 ( جدة بويز ) ( jeddah boys )
وإلي شجعني إني اكتب هذا الموضوع إنه تقريبا هذا النوع من التعديل
بدأ ينتشر في عالم تعديل السيارات 
وثانيا الأفكار الخاطئة الي لاحظتها عند اغلب الشباب عن النظامين 
لأنه الأغلبية بيخلط
بين الهيدروليك سستم 
والإيرباق سستم أو نظام الهواء




واكبر خطأ شائع هو مقولة
 (هيدروليك زيت) (وهيدروليك هواء) وهذي الكلمتين كلها خطأ




الهيدروليك سيستم ما يحتاج انك تقول هيدروليك زيت لأنه كلمه هيدروليك يقصد بها 
نوع الزيت الي بيشتغل بيه النظام أو أساس تشغيل النظام
والذي يسمى 
( زيت الهيدروليك ضغط 10 ) 
وموجود في محلات قطع الغيار والبناشر 




أما نظام الهواء مثل الأيرباق سيستم واكبر خطأ انك تقول عليه هيدروليك هواء 
الخطأ انه السيستم حق الهواء مايدخل فيه نقطة زيت واحده لأنه يعتمد كليا على
الهواء المضغوط أو المشحون




وراح أفسر معانيها بالتفصيل
راح أبدأ بشرح النظامين بالتفصيل وسوف تلاحظون الفروق بكل وضوح




(الهيدروليك سيستم أو نظام الهيدروليك)
نظام الهيدروليك يعتمد اعتماد كلي على الزيت 




كيف يعمل ؟؟
يعمل النظام بالبطاريات السائلة أو البطاريات العادية مثل اللي تركب في السيارات 70 أمبير أو 80 أمبير 
او الي يسمها ( بطاريات الكتروني ) مثل السيارات الأمريكيه تقريبا
وسعرها من 170 إلى 250 ريال 




والأفضل هي البطاريات الجل وهذي غالية يوصل قيمه البطارية الوحدة إلى 400 ريال
وتستخدم غالبا في سيارات القصور أو سيارات ملاعب لعبة القولف 




ونظام الهيدروليك يعتمد أساسا على طرمبة الزيت أو بمب لضخ الزيت
وليات خاصة بنظام الهيدروليك تتحمل ضغط عالي جدا جدا حتى يكون في نظام تصنيعها 
ومغلفة بطبقه أسلاك
(يعني تمسك السلك كأنه كفر ضغط)




و تحتاج المساعدات الخاصة بالهيدروليك لكن اسمها ليس مساعدات بالمعنى الحقيقي
خصوصا في هذا النظام وتسمى سيليندر أو بالعامية بستم 
ولابد من تغيير اليايات أو السست الخاصة بالهيدرولك لكي توصل قوه اليايات إلى حمل 4 طن 
وهذي تسمياتها ومقاساتها في شركات الهيدروليك
طن ونص , 2 طن , 2.5 طن , 3 طن ........الخ ومقاساتها كثيرة




وكل مقاس من هذي اليايات لها ميزه وكل ما أصبح الياي اقوي وأطول يكون التنقيز بالسيارة أعلى وأقوى 
وبالعكس كل ما كان الياي أقوى كل ماكانت السيارة أقسى وأصعب في السواقة
ونسيت أقلكم انه في نظام الهيدروليك لازم الشنطه ينشال منها كل القماش للأمان أو سيفتي خاص
انك تشيل القماش الي موجود في الشنطه كامل وتطلي الشنطه مواد عازله للحريق والماس الكهربائي 




ليش ؟؟؟؟؟؟؟؟؟
أنا عارف إنكم بتتسائلوا هذا السؤال وهاذي الإجابة
لأنه في بعض الأحيان البطاريات تعمل شرار أو الأسلاك الكهربائية تسخن وتحترق لحالها
أو ممكن يحصل ماس كهربائي وهذا لو كان بجانبه أي شي سريع الاشتعال
يكون موجود بالشنطة في السيارة يعني أي شرار أو أي ماس أو سلك ينحرق 
 لهذا السبب تلغي
أي شي سريع اشتعال من الشنطة




والهيدروليك يفضل انك تركبه على السيارات الدفع الخلفي




والسيارات القديمة أو الأمريكي الكلاسيكية او الجموس لأنه الهيدروليك يحتاج سيارة صلبه وقويه
في نفس الوقت 
وفوق قوتها لازم تدعم وتقوي وتدبل حديد الشاصي 




وكل شي له طريقه في تدعيمه
وأحيانا تحتاج سلاسل للتدعيم 
وتحتاج جنوط سلك صغيره مقاس "14 أو"13 وأكثر شي مقاس 15" إذا تبي تسوي شغب ههههه




وفي حالة تبغى تسوي جنان بالسيارة ممكن تركب أي مقاس كبير بس لاتنقز بالسياره عشان 
لاتنكسر الجنوط أوتحبل الكفرات وتكره اليوم الي ركبت فيه الهيدروليك




مميزات الهيدروليك
1- أول شي ممكن يخلي السيارة تمشي على 3 كفرات
2- سرعة رائعة جدا في النزول والطلوع وكل مازادت البطاريات كلما كان أسرع
هذي العملية فيها هندسه كهربائية يعني ممكن تشغل 6 بطاريات في وقت واحد بقوه 24 بطارية
أوضح أكثر
بطارية + بطارية + بطارية + بطارية + بطارية + بطارية = 72v الكل على جميع الطرمبات الأربع 
بس انه راح تنتهي البطاريات بسرعة
لكـــــن
بطارية + بطارية + بطارية + بطارية + بطارية + بطارية = 72v على الطرمبه رقم واحد




بطارية + بطارية + بطارية + بطارية + بطارية + بطارية = 72v على الطرمبه رقم اثنين




بطارية + بطارية + بطارية + بطارية + بطارية + بطارية = 72v على الطرمبه رقم ثلاثة




بطارية + بطارية + بطارية + بطارية + بطارية + بطارية = 72v على الطرمبه رقم أربعة




أخذنا نفس القوه بس الفرق حتى العمر الافتراضي للشحن مده أطول
مع انه الطرمبه الوحدة تحتاج على الأقل 36V
3- ممكن تنقز بالسيارة اعلي من 2 متر
4- ممكن يعيش 10 سنوات إذا كان تركيبه واستخدامه صح




5- ممكن ترفع السيارة مسافات عاليه جدا وتلصقها في الأرض في نفس الوقت




عيوب نظام الهيدروليك 
1 - أقصى سرعة بالسيارة 60 كلم وإذا كان خط سريع ويكون الطريق صافي من المطبات والبطانيج الأسفلتيه ممكن تسرع بالسيارة حتى 100 كلم لأنه السيارة راح تصير قاسيه جدا لدرجه انك راح تحس انك بتسوق دركتر أو سيارة بوب كات الصغيرة بسبب اليايات القوية ولأنه السيليندر حق الهيدروليك مهو مرن زي المساعدات العادية حقت السيارة لأنه بستم الهيدروليك يا فوق يا تحت مافي مرونة ابدا




2- مكلف جدا وسعره يبدأ من 10,000 إلى 25,000 وممكن أكثر 




3- وتكلفة تركيبه عاليه لأنه يحتاج توليفات وتعديلات كثيرة في السيارة
وكل تعديل يأخذ مبلغ ووقت وجهد 




4- وتحتاج صيانة السيارة كثير لأنه يخرب جلود المقصات وجلود البودي وكراسي المكينة بسرعة وحسب إستخدامك للهيدروليك من تنقيز متواصل أو استعراض خفيف كله يفرق في وقت الصيانة
 
5- يحتاج واحد يستخدمه بحذر وفن لأنه التضغيط الغلط والحركات الغلط كلها لها تأثيرات جانبيه على السيستم والطرمبات




6- تحتاج البطاريات للشحن بإستمرار عن طريق شاحن السيارات العادي مثل الموجود عند البناشر ومحلات البطاريات ولازم كل واحد عنده هيدروليك يكون عنده شاحن بطاريات




7- يحتاج غيار زيت كل فتره بس هذا مهو شي مكلف تقريبا كل 3 شهور وحسب الاستخدام ممكن اقل أو أكثر








أما نظام الهواء أو الأيرباق سيستم




نظام الهواء يعتمد اعتماد كامل على الهواء فقط الي يكون مضغوط في اسطوانة هوائيه 
يعبأ فيها الهواء لكي تكون السيارة مستعدة لأي حركه تتطلبها من السويتش 
وكل ما كان عدد مواطير الهواء اكبر أو اقوي كلما كان أفضل




الهواء اللي يرفع السيارة بيروح على 
 مساعدات الهواء الي في هذا النظام لازم نستغني عن هذا الأسم 
ونقول ايرباق سيستم (البالونات الهوائية) أو سيليندر اير سيستم
 
وحتى نظام الهواء يحتاج ليات الي توصل الهواء إلى الأيرباق 




ويحتاج بطارية وحدة في الشنطة بس عشان توفر كهرباء إضافية الطرمبات حقت الهواء 
وما يحتاج وجود سست أو يايات في نظام الهواء
 
مميزاته 




سهل التركيب 




غير مكلف وسعره يبدأ من 7000 ريال إلى 15,000 ريال وكل مازودت وقويت القطع وعدلت زاد سعره 
ما يحتاج تدعيم أو تقويه في البودي
وما يحتاج سيارات صلبه أو فيها شاص قوي زي الهيدروليك 




مريح في السواقة خصوصا في الأيرباق سيستم لأنه السيارة ماشيه على هواء منفوخ في بلونات
 (يعني آخر فله وأحلى نطنطه)
اما في نظام السيليندر أو البستم شوي أقسى وكل واحد يفضل على حسب نوع السيارة الي راح يركب عليها 




يركب على كل السيارات سواء خلفي أو أمامي 
تقدر تستخدم السيارة بشكل يومي بكل راحة تقريبا




ما يآخذ مساحه كبيره في السيارة والشنطه




عيوبه نظام الهواء
تحتاج تأخذ تقريبا 5 دقائق حتى تشحن الأسطوانات في أول تشغيل وإذا كثرت في الاستعراض لازم تعطي المواطير فرصه تشحن هواء




بصراحة في رأيي الخاص ما أحس إنه رائع مثل الهيدروليك لأنه ما يمشي على ثلاث كفرات وما ينقز السيارة 




بالإضافة لذلك حركاته تعتبر بطيئة جدا بالنسبة للهيدروليك بكثير, وطلوع السيارة سريع لكن نزولها بطيئ ويعتمد أكثر شئ على وزن السيارة في سرعه النزول تقريبا




أعطال النوعين 
طبعا ومثل ماهو معروف لا يوجد شئ في الدنيا لا يتعطل أو يتعرض للخراب
لكن اغلب الخرابات تأتي من الاستخدام الخاطئ أو من خطأ في التركيب وأكثر مشكلة في النوعين وهي تعتبر نادرة ممكن أنبوب أو بالعامية لي يتخرق أو ينفقع أو ينجرح وإصلاحه بسيط بس تغيره أو تعمل له إصلاح 




بالنسبة للهواء أو الأيرباق يحتاج تقريبا كل فتره تغير جلود الأيرباق , حوالي كل سنه تقريبا
وكله يرجع ويعتمد بشكل كبير على حسب الإستخدام وحسب حرارة الجو لأنه الجلود معروف عنها إنها تنشف بسرعة بسبب الحرارة
وشكرا على المتابعة .

إبلاغ

الردود